डा विकास देवकोटा स्वास्थ्य सचिव नियुक्त भएको तीन महिना नपुग्दै पत्नीलाई स्वास्थ्य मन्त्रालय मातहतको एक अस्पतालको अधिकृत स्तरको पदमा ठाडो नियुक्ति दिलाएको भेटिएको छ । उनले आफ्नो श्रीमती विष्णु भुजेललाई विना प्रतिष्प्रर्धा नर्सिङ प्रशिक्षक नियुक्त गरेको पाइएको छ । सचिव देवकोटाको दबाब र प्रभावमा नै श्रीमतीलाई विना प्रतिष्प्रर्धा परोपकार प्रसूति तथा स्त्रीरोग अस्पतालको नर्सिङ क्याम्पसमा नर्सिङ प्रशिक्षक नियुक्त गरेको अस्पतालका कर्मचारीहरुले जनाएको छ ।
बिज्ञापन
पूर्ववर्ती सरकारले गत फागुन २१ मा देवकोटालाई स्वास्थ्य सचिवमा नियुक्त गरेको थियो । स्वास्थ्य सचिवका लागि बढुवा समितिले वरीयताका आधारमा डा. संगीता कौशल मिश्रा, डा. विकास देवकोटा र डा. टंक बाराकोटीको नाम सिफारिस गरेको भए पनि सरकारले देवकोटालाई स्वास्थ्य सचिवमा बढुवा गरेको थियो । बढुवा हुँदा उनी स्वास्थ्य सेवा विभागका महानिर्देशकको जिम्मेवारीमा थिए । २०८१ असोज ६ देखि उनी विभागको महानिर्देशकको जिम्मेवारीमा रहँदा समेत खरिद प्रक्रियामा बदमासी र मिलेमातो गरेको भन्दै उनी उपर छानबिनको माग गर्दै विभिन्न सरोकारवाला निकायमा उजुरी परेका छन् । ०५३ सालमा सेवा प्रवेश गरी २०७९ चैत १३ गते १२औं तह अर्थात् अतिरिक्त सचिवमा बढुवा भएका उनले लुम्बिनी प्रदेशको स्वास्थ्य सचिवको जिम्मेवारीमा रहँदा विवादमा परेका कर्मचारी हुन ।
बिज्ञापन
उनै देवकोटा सचिव नियुक्त भएसँगै आफ्नी पत्नीलाई विना प्रतिष्प्रर्धा परोपकार प्रसूती तथा स्त्रीरोग अस्पतालमा प्रवेश गराएका हुन । उनी सचिव बढुवा भएको तीन महिना पछि नै श्रीमतीलाई परोपकार प्रसूती तथा स्त्री रोग अस्पतालको नर्सिङ प्रशिक्षकमा नियुक्त गरेका हुन । क्याम्पसले करार कर्मचारी नियुक्ति नियमावली नबनाई गत चैत्र र वैशाखमा डा देवकोटाकी श्रीमती भुजेलसहित चार जना नर्सिङ प्रशिक्षक नियुक्त गरेको हो । देवकोटा पत्नी भुजेलको सेवा अवधि जेठ १ गतेबाट ०८३ असारसम्म तोकिएको छ । उनी सचिव नियुक्त भएको तीन महिना पछि श्रीमती भुजेललाई अस्पतालको नर्सिङ प्रशिक्षकको रुपमा नियुक्त गरिएको हो । यस अघि पनि यसै गरी ठाडै तीन जनालाई नर्सिङ प्रशिक्षकमा विना प्रतिष्प्रर्धा नियुक्त गरिएको थियो । अस्पतालले आवेदन नै माग नगरी आन्तरिक रूपमा प्रतिस्पर्धाका नाममा उनीहरुलाई नियुक्त गरेको हो ।
अस्पताल प्रशासनले विष्णु भुजेल सचिव विकास देवकोटाको श्रीमती भएको स्वीकार गरेको छ तर उहाँको नियुक्ति नियमसंगत ढंगबाटै भएको अस्पतालले भनेको छ । कर्मचारी प्रशासनले अस्पताल प्रशासनसँग यो बिषयमा जिज्ञासा राख्दा, सचिवको सोर्स फोर्सको आधारमा नभइ आन्तरिक प्रतिस्पर्धामार्फत सचिव देवकोटा पत्नी भुजेलसहित चार जनालाई नियुक्त गरेको जनाएको छ । अस्पतालले भने ०८१ पुस २२ मा परोपकार नर्सिङ क्याम्पसले ४ जना प्रशिक्षकको माग गरेको जनाएको छ । क्याम्पस व्यवस्थापन समितिद्वारा गठित छनोट समितिले २०८१ फागुन १२ र १३ मा आवेदकहरूको अन्तर्वार्ता र माइक्रो टिचिङ लिएर सिफारिस गरेको आधारमा साइक्याट्रिक हेल्थ नर्सिङ र कम्युनिटी नर्सिङ विषयका प्रशिक्षक नियुक्त गरिएको र ०८२ वैशाख २१ मा पेडियाट्रिक विषयका लागि माग भएपछि प्रतिक्षा सूचीको तेस्रो वरियतामा रहेकी विष्णु भुजेललाई २०८२ जेठ १ देखि करारमा नियुक्त गरिएको अस्पतालले जनाएको छ । सो क्याम्पसमा हाल १२ जना नर्सिङ प्रशिक्षकहरू रहेका जनाएको छ । भुजेललाई अधिकृतस्तरको छैटौँ तहको पदमा नियुक्ति दिलाइएको हो ।
बिज्ञापन
प्रसूतिगृह अस्पतालले विसं २०७३ साल देखि कुपण्डोलस्थित परोपकार नर्सिङ क्याम्पस सञ्चालन गरेको छ । सुरुका दिनमा प्रविणता प्रमाणपत्र तहको नर्सिङ कार्यक्रम सञ्चालन भएता पनि हाल उक्त कार्यक्रम स्थगित भई बीएमएस र बीएस्सी नर्सिङ कार्यक्रम सञ्चालन भईरहेको जनाइएको छ ।
